गणपती विसर्जन मिरवणुकीतील DJ-साउंड वाहनांवर RTO ची करडी नजर; वाहनांची तपासणी करून नियमभंग करणाऱ्यांवर कारवाई..

गणपती विसर्जन मिरवणुकीच्या पार्श्वभूमीवर DJ, मोठे साउंड सिस्टिम व ध्वनिक्षेपक लावून मिरवणुकीत सहभागी होणाऱ्या वाहनांकडे परिवहन विभागाचे विशेष लक्ष राहणार आहे. मिरवणुकीदरम्यान वापरल्या जाणाऱ्या वाहनांची तांत्रिक स्थिती, वाहनावरील साउंड सिस्टिमची मांडणी तसेच वाहनाच्या सुरक्षिततेशी संबंधित बाबींची तपासणी करून नियमांचे उल्लंघन आढळल्यास नियमानुसार कारवाई करण्याचे निर्देश वैजापूर उपप्रादेशिक परिवहन कार्यालयाने दिले आहेत.

गणपती विसर्जनाच्या दिवशी म्हणजेच दि. २५ सप्टेंबर २०२६ रोजी सकाळी ८ वाजेपासून ही तपासणी सुरू करण्यात येणार आहे. वैजापूर उपप्रादेशिक परिवहन अधिकारी संदीप निमसे यांनी याबाबत कार्यालयीन आदेश जारी करून संबंधित मोटार वाहन निरीक्षकांची पोलीस ठाणे व तालुकानिहाय नियुक्ती केली आहे.

DJ-साउंड वाहनांची विशेष तपासणी

विसर्जन मिरवणुकीमध्ये मोठ्या प्रमाणावर DJ, साउंड बॉक्स, स्पीकर व इतर ध्वनीवर्धक यंत्रणा वाहनांवर बसवून त्यांचा वापर केला जातो. त्यामुळे अशा वाहनांमुळे मिरवणुकीतील नागरिकांच्या सुरक्षिततेला धोका निर्माण होऊ नये, तसेच वाहनाच्या मूळ रचनेत करण्यात आलेल्या बदलांमुळे कोणतीही समस्या निर्माण होऊ नये, यासाठी परिवहन विभागाकडून विशेष तपासणी करण्यात येणार आहे.

वैजापूर, विरगाव, शिवूर, गंगापूर, शिल्लेगाव, या परिसरासाठी स्वतंत्र मोटार वाहन निरीक्षकांची नियुक्ती करण्यात आली आहे. संबंधित अधिकाऱ्यांना २५ सप्टेंबर रोजी सकाळी ८ वाजता नियुक्त ठिकाणी उपस्थित राहून विसर्जन मिरवणुकीत सहभागी होणाऱ्या वाहनांची तपासणी करून अहवाल सादर करण्याचे निर्देश देण्यात आले आहेत.

मिरवणुकीपूर्वीच वाहन तपासणीवर भर

विसर्जन मिरवणुकीत मोठ्या संख्येने नागरिक सहभागी होत असल्याने DJ व मोठ्या साउंड सिस्टिमची वाहतूक करणाऱ्या वाहनांची सुरक्षितता आणि नियमपालनाला विशेष महत्त्व देण्यात आले आहे. मिरवणुकीदरम्यान वाहनांमध्ये तांत्रिक बिघाड होऊ नये किंवा वाहनातील अनधिकृत बदलामुळे धोका निर्माण होऊ नये, यासाठी RTO पथकांकडून प्रत्यक्ष तपासणी केली जाणार आहे.

पोलीस–परिवहन विभागाचा समन्वय

गणपती विसर्जन मिरवणुका शांततापूर्ण, शिस्तबद्ध आणि सुरक्षित वातावरणात पार पडाव्यात, यासाठी पोलीस विभाग आणि परिवहन विभाग यांच्यात समन्वय ठेवण्यात येणार आहे. विशेषतः DJ-साउंड वाहनांकडे आणि त्यांच्या तांत्रिक स्थितीकडे RTO पथकांचे लक्ष राहणार असून, नियमभंग आढळल्यास कारवाई केली जाणार आहे.